*खिरबोज(कद्दू) का टुकु कु साग अर भात*

सामाग्री:-
द्वी मुट्ट टुक,एक बड़ु प्याज,6-7 जख्यला लासण, हैरि मर्च भि 6-7,(जो लालमर्च खंदि वो स्वाद अनुसार लाल मर्च डाळि सकदिं), द्वी चम्मच भंगुला का बीज, अदरक कु एक टुकड़ा, लूण(स्वाद अनुसार), धनिया, हल्दी, साबुत जीरा अर साबुत धण्याँ(तुड़का लैक), जरसि अमचूर या इमली कु रस, घी/तेल/रिफैंड|

*बणाणौं सगोर*
सबसे पैलि टुक ध्वै दीणि, टुक कुंगळा छैं तब त ध्वैकि सीधा काटि सकदों पर जिरजिरा छैं त ऊँका ल्वस्ट्या निकाळि दिणि , जब साफ ह्वे जाला सबि टुक त म्वाटा-म्वाटा काटि दीणि,अब एक पत्यला म करीब एक लीटर पाणि उमाळो , उमळ्दु पाणि म कट्याँ टुक जरा देर खण डलणि जनकै वु जरा नरम ह्वे जैं अर ऊँकि जो एक गंध सि हूंद वो निकळ जा.. एक करछि/पणैं ल फटाफट चला कि पाणि बटि निकाळ दीणि, अब सिल्वटा म या मिक्सी म सबि मसलों कु पेस्ट बणा दीण, फिर उमळ्याँ टुक भी बरीक कैरिकै पीस दीणि.. ऊँको भि अलग से पेस्ट बणा दीण|कढ़ै म द्वी चम्मच घी/तेल/रिफैंड कुछ भि डालौ(घी ज्यादा सवदि अर पौष्टिक रालु) .. गरम हूण पर जीरु अर धण्याँ तुड़का डालिकि मसला भूनो, टमाटर डाळि पकाओ अर तब टुकु पेस्ट डाळिकि खूब चलाओ... जरूरत अनुसार गरम पाणि डाळिकि खूब पकण दीण, अमचूर या इमली रस अपणों हिसाब से डाळ सकदो|
भात या रोटि दगड़ परोसो, खाओ... विटामिन से भरपूर साग भौत सवदि हूंद
🙂
|
(क्वी लोग बेसनौ आलण बि डलदिन पर वांकि खास जर्वत नि हूंदि)|

©®सुनीता ध्यानी|
नैनीडाँडा, गढ़वाल, उत्तराखण्ड|